ഓർമ്മകൾ പൂക്കുമെന്റെ പൂവനങ്ങളിൽ
നീ വരൂ ചുണ്ടിലോണപ്പൂവുമായ് സഖീ
നെഞ്ചിലെ പാട്ടുതരാം മാറിലെ ചൂടുതരാം
എന്നുമെൻ സ്നേഹമാലകൾ ചാർത്തിടാം
       
ഓർമ്മകൾ പൂക്കുമെന്റെ പൂവനങ്ങളിൽ
നീ വരൂ ചുണ്ടിലോണപ്പൂവുമായ് സഖീ

ആവണിപ്പൂന്തൊടിയിൽ ആതിരതൻ പാൽക്കടവിൽ
ആയിരം ജന്മമായ് ഞാൻ കാത്തുനിൽക്കയായ്
കേട്ടില്ല നിൻ കൊലുസിൻ കൊഞ്ചലെങ്ങും ഈ വഴിയിൽ
പെയ്തെന്റെ നൊമ്പരത്തിൻ നീർപ്പളുങ്കുകൾ…

ഓർമ്മകൾ പൂക്കുമെന്റെ പൂവനങ്ങളിൽ
നീ വരൂ ചുണ്ടിലോണപ്പൂവുമായ് സഖീ …

ആ… ആ…. ആ… ആ…….
ഈവർണ്ണപ്പൂക്കളവും ഈയോമൽ പൂവിളിയും
നാം പണ്ടുകണ്ടുമുട്ടും ഉത്രാടസന്ധ്യകളും
എങ്ങനെ ഞാൻ മറക്കും? ജീവിതത്തിൻ നീർച്ചുഴിയിൽ
മുങ്ങുന്നു നമ്മൾ തൻ കടലാസുതോണികൾ

ഓർമ്മകൾ പൂക്കുമെന്റെ പൂവനങ്ങളിൽ
നീ വരൂ ചുണ്ടിലോണപ്പൂവുമായ് സഖീ
നെഞ്ചിലെ പാട്ടുതരാം മാറിലെ ചൂടുതരാം
എന്നുമെൻ സ്നേഹമാലകൾ ചാർത്തിടാം

ഓർമ്മകൾ പൂക്കുമെന്റെ…..
പൂവനങ്ങളിൽ…….
നീ വരൂ……. ചുണ്ടിലോണ
പൂവുമായ് സഖീ……

 

കറുകറുത്തൊരു കാർമുകിൽ, ഇന്നു
കാറ്റടിച്ചേ പോയ്,
കറു കറുത്തൊരു കാർമുകിൽ, ഇന്നു
കാറ്റടിച്ചേ പോയ്, നിൻ
നനഞ്ഞ പൂന്തുകിലുണക്കുവാനിള-
വെയിലു തന്നേ പോയ്, ചിങ്ങ-
പ്പുലരി പെൺ‌കൊടി കിഴക്കേകോലയിൽ
തിരി തെളിച്ചപ്പോൾ , നിൻ
തുടുത്ത പൂംകവിൾ കുങ്കുമം, അവൾ
തുറന്ന ചെപ്പിൽ നിന്നോ
അവൾ തുറന്ന ചെപ്പിൽ നിന്നോ

കറുകറുത്തൊരു കാർമുകിൽ, ഇന്നു
കാറ്റടിച്ചേ പോയ്…,

പാടം നിറയെ പച്ച വിരിക്കും
ചെറുമി പെൺ‌കിടാങ്ങൾ; അന്നു
ഞാറു നടുമ്പോൾ ചൊല്ലിയൊരീരടി
നമ്മെ കുറിച്ചല്ലേ?
കാവിലെ തേവരെ കാണുവാൻ പോയപ്പോൾ
ഞാൻ കൂടെ വന്നില്ലേ, ഊഞ്ഞാൽ
കൂട്ടുകാരൊത്ത് നീ ആടിയ നേരം
ഒളിച്ച്‌ കണ്ടില്ലേ?
കാണാന്‍ കൊതിച്ചു നിന്നില്ലേ
 
ഇന്നെന്റെ മുറ്റത്തെ ചെമ്പകച്ചില്ലകൾ
പൂമണം തൂകുമ്പോൾ, ജാലക
വാതിലിലൂടിരു മിഴികളും നട്ടു
കാത്തു നിന്നേ ഞാൻ
നനുത്ത പൂവിരൽ നീട്ടി നീ തുമ്പ
പൂവിറുക്കുമ്പോൾ, എന്റെ
മനസ്സിലെ പ്രേമക്കതിരുകൊണ്ടൊരു-
കണിയൊരുക്കീ ഞാൻ, പൂ-
ക്കളമൊരുക്കീ ഞാൻ
 

വസന്തകാല രഥമേറിവന്നല്ലോ പൊന്നോണം
വസുന്ധര തൻ മനതാരിൽ തെളിയുന്നു പൊൻ ദീപം
ഹൃദയാങ്കണത്തിൽ പൂക്കളമൊരുക്കാൻ
ഉണരുക നീയെൻ പ്രിയസഖിയേ

ശ്രാവണമാസത്തിൻ ശാലീനതകളിൽ
താരകപ്പൂവുകൾ കോർത്തൊരു മാല്യം
ചാരുമനോഹരീ, നിന്റെ കാർവേണിയിൽ
സാദരം ചൂടിക്കാൻ ഞാനൊരുങ്ങുമ്പോൾ
നാണം കവിളത്തു പൂവിട്ടുവോ
രാഗം ചൊടികളിൽ ശ്രുതിയിട്ടുവോ

സാഗര സീമയിൽ സായന്തനങ്ങളിൽ
ശീതള ചന്ദനം ചാർത്തിടും കാലം
ദേവമനോഹരീ, നിൻ‌തിരു നെറ്റിയിൽ
മാധവ സന്ധ്യകൾ കുങ്കുമം തൊടുമ്പോൾ
മോഹം മറയത്ത് കതിരിട്ടുവോ
മേഘം
 

 പൂക്കൈതപ്പാടത്തെ പൂമൈനപ്പെണ്ണുങ്ങൾ
ചിരിക്കുന്നതും പാട്ട്, കരയുന്നതും പാട്ട്

മൂവന്തിനേരത്ത് പേരാലിൻ‌കൊമ്പിന്മേൽ
ഗന്ധർവ്വന്മാരുടെ വരത്തുപോക്ക്
തെരണ്ടുകുളിച്ചുവരും കുന്നത്തെ പൂവാലിക്ക്
ചെമ്മാനം കൂട്ടുന്നു ചാന്തുപൊട്ട്, മാറിൽ
മിന്നിത്തിളങ്ങുന്ന വൈരക്കല്ല്

പൂക്കൈതപ്പാടത്തെ പൂമൈനപ്പെണ്ണുങ്ങൾ
ചിരിക്കുന്നതും പാട്ട്, കരയുന്നതും പാട്ട്

നാടായ നാടെല്ലാം ചിങ്ങക്കുരുത്തോല    
തോരണം കെട്ടുന്നു ഓണരാവ്
ആരാരും കാണാതെ ഇക്കിളികൂട്ടീടും
കള്ളനെയോർത്തെന്നും കാത്തിരിപ്പ്, നെഞ്ചിൽ
തുള്ളിത്തുളുമ്പുന്നു പ്രേമനോവ്

പൂക്കൈതപ്പാടത്തെ പൂമൈനപ്പെണ്ണുങ്ങൾ
ചിരിക്കുന്നതും പാട്ട്, കരയുന്നതും പാട്ട്

മാനത്തുകണ്ണികൾ നീന്തിത്തുടിക്കുന്ന
ചാലിന്റെയോരത്ത് പന്തൽ കെട്ട്
പാവുമ്പാക്കാവിലെ പുള്ളോത്തിപ്പെണ്ണിന്ന്
നാളെവെളുക്കുമ്പോൾ മിന്നുകെട്ട്, പിന്നെ
മാരന്റെ കൂടൊരു യാത്രപോക്ക്

പൂക്കൈതപ്പാടത്തെ പൂമൈനപ്പെണ്ണുങ്ങൾ
ചിരിക്കുന്നതും പാട്ട്, കരയുന്നതും പാട്ട്
ചിരിക്കുന്നതും പാട്ട്, കരയുന്നതും പാട്ട്,
കരയുന്നതും പാട്ട്
ഉം…ഉം.. ആ… ആ.. ആ… ആ…