പൂക്കളം തീർക്കുവാൻ

Song: 

Pookkalam-128-OnamwitheeNam2013.mp3

പൂക്കളം തീർക്കുവാൻ പൂതേടി നമ്മളാ
തൊടിയിൽ നടന്നത് ഓർമ്മയുണ്ടോ
പുത്തനുടുപ്പും പാവയുമായ് നമ്മൾ
തുള്ളിക്കളിച്ചതും ഓർമ്മയുണ്ടോ
ഒരുമിച്ചൊരൂഞ്ഞാൽ പാട്ടിന്റെയീണത്തിൽ
പൂമാനം തൊട്ടതും ഓർമ്മയുണ്ടോ.
നിനക്കോർമ്മയുണ്ടോ…..(പൂക്കളം തീർക്കുവാൻ)

പൂവിതൾ കൊണ്ടൊരു പൊട്ടുതൊട്ടു, നിന്റെ
പൂങ്കവിൾ നുള്ളിയതോർമ്മയുണ്ടോ
ഉത്രാടരാത്രിയിൽ തെക്കിനിത്തിണ്ണയിൽ
നിഴലായ് നിന്നതും ഓർമ്മയുണ്ടോ
അറിയാതെ അറിയാതെ ആത്മാവിലാദ്യത്തെ
അടയാളമർപ്പിച്ചതോർമ്മയുണ്ടോ..
നിനക്കോർമ്മയുണ്ടോ…(പൂക്കളം തീർക്കുവാൻ)

പുലരിയിൽ പുഞ്ചിരിപ്പൊയ്കയിൽ നീയൊരു
പൂവായ് വിരിഞ്ഞതും ഓർമ്മയുണ്ടോ
പൂവിളി മാഞ്ഞപ്പോൾ പൂക്കളം മാഞ്ഞപ്പോൾ
പൂമിഴി തൂവിയതോർമ്മയുണ്ടോ
ഇനിയും വരാമെന്ന വാക്കിനാൽ ഞാൻ നിന്റെ
മിഴിനീർ തുടച്ചതും ഓർമ്മയുണ്ടോ…
നിനക്കോർമ്മയുണ്ടോ..(പൂക്കളം തീർക്കുവാൻ)